Poet Kamal Farid

  مشاعر مهاجر شعر: د. كمال فريد ---  قصيدة "مشاعر مهاجر" --- شعر: د. كمال فريد إسحق --- وطني ... مش بلدي عشان أنا فيه موجود وطني ... مش بلدي عشان أنا فيه مولود وطني ... مش بلدي عشان فيه ليَّا جدود وطني ... مش إسم وأرض وناس وحدود وطني ... لو حاسس فيه إن انا مرفوض هيبقى كإنه مالهش وجود. وطني ... مش بلدي عشان فيه ليَّا اخوات وللا عشان فيه ... أولاد وبنات ولا حتى عشان ..  ده يبقى مكان .. كان ليَّا زمان: وطني مش وطني وانا فيه باتهان .. معنى الأوطان: إحساس بأمان إحساس بكرامة .. وبإطمئنان. --- بلدي ... ماهياش بلدي ولا أرض ابويا وجدي ولا أرض بنتي وولدي مش مطرح مااتولدت ولا مطرح ما اترعرعت ولا ارض الذكريات وحكاياتي واللي فات ولا حتى عشان فيها اتربيت وللا اتنططت فيها وجريت ولا حتى لعبت ، ووقعت وقمت ، وصحيت أو نمت بلدي ما تبقاش بلدي ولا ارض أبويا وجدِّي لو احس فيها بغربة لو ألقى فيها محاربة  هتبقى إيه غير تربة؟ وسببها أخويا إبن امي وابويا اللي ع الكره اتربَّى.   --- وطني .. مش اي مكان كان ليَّا زمان فيه نكره بعض ونقول إخوان .. وطني الإنسان ...