زجل: يا ترى ليا حق؟ وللا لأ؟
زجل:
ياترى ليا حق؟ وللا لأ؟
---
د. كمال فري
---
يا ربنا يا كبير
تعبت م التفكير
لما انت كاتبلي الألم
فين حقي بأه في النعم؟
فين حقي في المتعة؟
فين حقي في اللذة؟
مش يبقا من حقي
كاس بيرة بالمزة؟
قعدة مع المزة؟
او بطة او وزة؟
آكلها واتهنى
ليه بس استنى
وعد بالجنة
وانا اللي شقيان
في اغلب الأحيان
في عيشتي في الدنيا
ارحمني دانا انسان
وعندي احتياجات
في حاجات كتير تانية
ومادام خلقتلي قلب
من حقي إني أحب
من حقي اتمتع
واتهنى وأبقى أب
وزي ما دقت الألم
المتعة هيا العوض
وللا الالم وحده
هو اللي بس انفرض؟
العدل غير كدا
صحة قصاد المرض
لذة قصاد الشقا
متعة قصاد الألم
والعيشة الضيقة
قصادها عز ونعم
مش كله ذل وكرب
مش كله لطم وضرب
يا رب يا حنين
العدل بيقول لأ
:والحلال بين
المتعة لينا حق
---
د، كمال فريد
Comments
Post a Comment